Europako Itun Berdearen testuinguruan argitaratutako lege berriak itsas ingurunearen kontserbazioaren eta arrantza-jarduera errentagarriaren arteko oreka bermatu nahi du, eta, bidez batez, enpresa-garapenerako eta belaunaldi-txandarako erakargarria den arrantza-sektore modernoa eta lehiakorra finkatu.

Honako hauek dira jasangarritasuna zeharkako ardatz duen arau berri horren helburuak:

  • Arrantza-baliabideen kontserbazioa eta erabilera iraunkorra sendotzea.
  • Jarduerak enplegua sortzen lagun dezala saiatzea.
  • Kostaldeko eremuetan aberastasuna eta gizarte-kohesioa sortzea.
  • Arrantzaren arloan, zientziaren eta ekintza politikoaren arteko lotura indartzea.

Berritasun nagusiak

Lege berriak arrantza-baliabideen kontserbazioa eta erabilera jasangarria indartzeko neurriak hartzeko ahalmena sartzen du, besteak beste, harrapaketen bolumena mugatzea; edo arrantza-ahalegina, erabilitako tresnak eta aparailuak, espezieen pisua edo neurria arautzea; edo debekualdiak ezartzea, betiere sektorearen eskutik eta eskura dagoen informazio zientifiko onenean oinarrituta.

 

Gainera, lege berriak arrantzaren eta ikerketaren arteko lotura sendotzen du, aitortzen baitu ezaguera zientifikoa behar-beharrezkoa dela arrantza-jarduerarako, eta ezartzen du arrantzaren kudeaketan erabakiak hartzeko ezaguera zientifikoan oinarritu behar dela. Testuinguru horretan, legeak lehen aldiz ekiten dio arrantza‑baliabide genetikoei, zeinak potentzial handia duten elikagaien segurtasunaren arloan.

 

Bestalde, legean kuotak banatzeko irizpideak eguneratzen dira, arrantza-baliabideen ustiapena arrazionalizatzeko eta antolatzeko eta operadoreei ahalik eta segurtasun juridiko handiena bermatzeko mekanismo gisa. Irizpide berri horiek ahalbidetu egiten dute plangintza hobea egitea, sektorearen errentagarritasun ekonomikoan eragin izan dezan. Horrek erabili gabeko kuotak birbanatzeko aukera ematen du.

 

Azkenik, lege berria aurrerapen sozial handia da; izan ere, osasunarentzat kaltegarriak diren arriskuko arrantza-jardueretan erretiroa hartzeko adina murrizteko koefizienteak sartzen ditu. Jarduera horiek batez ere emakumeek gauzatzen dituzte, bestea beste, oinezko itsaskilariek, sare-konpontzaileek, neskatilek eta paketatzaileek.

2023ko 66. zenbakiko BOEko 7052 xedapena